Juan “Juju” Rasmijn tin e record di anota mas gol den play-off

E aña aki Arubaanse Voetbal Bond (AVB) lo reconoce un persona hopi conoci den e mundo di futbol. Ta trata di Juan Rasmijn, miho conoci como Juju, naci na Aruba dia 28 di Augustus 1967. Juju Rasmijn ta bin di Santa Cruz. Su mayornan ta Jan y Flora Rasmijn y Juju a lanta cu mas rumannan den cas, kendenan tambe a hunga bala pa hopi tempo. Su rumannan conoci ta Kees Rasmijn y Maikel Rasmijn.

Juju Rasmijn a cuminsa hunga bala desde su edad di mucha di 9 aña tempo cu Titichi Croes d.f.m. tabata dirigente di SV Estrella. Juju Rasmijn a cuminsa su carera den e ekipo di Estrella lifida, den cual el a milita den e divisionnan aspirant, junioren y mayor. Despues di esaki el a bay hunga pa SV Sportboys pa algun aña. Na 1981 el a forma parti di e seleccion hubenil di Aruba cu a hunga weganan pa mira cua isla lo forma seleccion di Antias. Pero na 1984 despues cu dirigentenan di SV Estrella a mira e potencial den Juju Rasmijn, nan a acerca su persona pa e regresa cas y el a milita den e oncena oraño.

Den e mes un aña aki A.V.B. a scoge Juju Rasmijn como e  “Hungado di Aña”. E aña aki tambe tabata e prome aña cu el a hunga su prome play-off cu Estrella. Durante su temporada den SV Estrella Juju Rasmijn a participa den mas cu 15 play-off y tabata un di esunnan cu a hunga mas wega di play-off. Den tur play-off el a score 9 biaha. Den SV Estrella Juju Rasmijn tabata un di e hungadonan cu mas exito ya cu e club aki el a 8 titulo campeon di Aruba. E añanan cu nan a titula campeon ta 1985, 1988, 1989, 1990, 1992, 1996, 1998, 1999 y 2 biaha sub campeon na 1987 y 1995/1996.

Na 1985 Juju Rasmijn a hunga den e ultimo Copa Antiano cu un club di Aruba a participa den e torneo aki. Desde aña 1985 te cu aña 2000 Juju Rasmijn a forma parti di e seleccion Nacional di Aruba y a participa den diferente wega internacional den region di Caribe, representando su dushi isla Aruba. Juju Rasmijn a hunga mas cu 20 wega p’e seleccion Nacional di Aruba.

Na 1990 contra e team di Jong Aruba, Juju Rasmijn a bira, a pesar cu e ta hunga den defensa, e prome hungado cu a score 5 gol den un wega di play-off. Te cu e fecha di awe, e record aki ta den su posesion. Na 1995 a eligi Juju Rasmijn como e hungado di aña 1995 Li-Prof como defensa di SV Estrella. Na aña 2006 Juju Rasmijn na e edad di 40 aña a cera un bunita carera den futbol, despues cu el a hunga 20 aña e deporte futbol. Riba tereno Juju Rasmijn tabata un conoci como un hungado ehemplar y uno cu semper a duna lo maximo.

E aña aki, ta dedica e campeonato di futbol Division di Honor 2017-18 na su persona, como un reconocimento pa su aporte y dedicacion na nos deporte rey, Futbol!