Un biaha mas Arubaanse Voetbal Bond (AVB), como e federacion di futbol, ta sigui sostene e clubnan y ta sigui brinda asistencia na unda cu tin necesidad y na unda cu ta posibel. E biaha aki AVB mester a interveni pa asina por a yuda e clubnan cu santo blanco pa por marca veld, no solamente pa ora di training, pero tambe pa ora e clubnan organisa nan wega. AVB a pasa na veld di Rooi Afo pa mira con ta bayendo cu e entregamento di santo.
“Despues cu mi persona a ser acerca pa e dirigentenan cu tin un problema pa nan por yega na santo blanco mi a tuma esaki como mi deber y obligacion pa yuda y bin cu un solucion. Nos sa cu tin un moratorio riba santo blanco, pasobra e reserva cu DOW tin na e momentonan aki ta destina por si acaso bin un calamidad y mester drecha e beachnan, nan por haci esaki rapido. Nos ta un pais turistico y ta conoci pa nos beachnan cu santo blanco y alabes nos ta den e periodo di horcan y pa e motibo aki tambe ta dificil pa haya santo blanco”, asina presidente di AVB, ing. Richard Dijkhoff, a bisa despues cu clubnan a acerc’e buscando un solucion.
Manera semper el a haci su maximo esfuerso y cuminsa move y pone tur cos cana pa asina por logra bini cu un solucion. El a tuma contacto hasta cu minister presidente, kende alabes ta minister di infrastructura y a splica su persona riba e situacion existente. A hasta cancela cierto weganan pa motibo cu no por marca veld. “Na momento cu a presenta e problema aki na e minister President, el a brinda su cooperacion mesora”, segun ing. Richard Dijkhoff. Asina ey por a logra cumpra santo blanco pa repartie na e clubnan di AVB.
Esaki ta e tarea di Arubaanse Voetbal Bond y un biaha mas por mira cu ta duna un man na e clubnan. Santo blanco ta necesario, pasobra no por marca tereno c’un otro tipo di santo na e momentonan aki. “Nos a haci lo maximo, hopi movemento, mester a dialoga, papia y convence. Nos ta gradici nos minister presidente, kende ta minister di infrastructura, pero tambe director di DOW, ing. Marlon Croes. Na momento cu a sinta cu ne, a splic’e di e necesidad existente pa santo blanco e no a duda y e la duna su cooperacion y awe a cuminsa reparti santo blanco pa alrededor di diesocho pa binti club na Aruba”, di acuerdo cu ing. Richard Dijkhoff.
Mainta trempan truck a sali cu santo blanco pa SV Estrella, Rooi Afo, SV Dakota y asina a sigui. Gilmar Croes, presidente di SV Dakota, a expresa di ta contento pa ricibi e santo blanco. E uzo di esaki ta masha importante. “Nos ta gradici AVB p’e santo blanco ricibi”, tabata su palabranan.
Esaki lo yuda cu e preparacion, wega y training di diferente liga. SV Dakota tin diesun team y dies liga y santo blanco ta un di e necesidadnan mas grandi durante un campeonato. E lo yuda cu preparacion di veld, mantencion y marcamento pa e futbolistanan por train mas comodo posibel.
