ORANJESTAD, Aruba – 20 di December 2019: E programa “Next Play” a yega su final despues cu a inicia e programa aki den luna di October 2019 ultimo. Despues cu a organisa 2 dia di curso pa maestronan di 10 scol basico y e instructornan di IBISA a duna entrenamiento na e alumnonan. Arubaanse Voetbal Bond (AVB) hunto cu IBiSA a traha riba e programa aki y e festival a culmina cu 10 wega entre e scolnan Colegio Conrado Coronel, Sint Franciscus College, Maria School, Maria Goretti College, Prinses Amalia Basisschool, S.B. Washington, Colegio Cristo Rey, St. Michael School, St. Aloysius School y St. Anna School.
AVB a traha duro pa por a trece e proyecto aki Aruba. A tuma nota di un final di e proyecto exitoso cu a bin di un preparacion desde October, asina Ing. Richard Dijkhoff, President di AVB, a expresa. Cu e culminacion unda cu tur 10 scol participante a enfrenta otro y a saca 1 solo ganado, cual ta tur esunnan cu a participa den e proyecto aki.
Esaki ta un proyecto cu CONCACAF ta haciendo pa 1 aña caba den Caribe. E intencion ta pa trece e muchanan mas cerca di futbol. Por a mira esaki na e muchanan, docentenan y instructornan kendenan tabata hopi entusiasma. Hopi mayornan tabata presente pa asina apoya nan yiunan cu a participa. E mainta aki por a mira un festival hopi bunita, cu participacion di tur e muchanan di e 10 scolnan cu a participa.
Desde comienso te final e programa a cana manera plania. Tur docente, instructornan y muchanan presente a disfruta di e dia. Edgar Erasmus, Hoofd sport en beweging IBiSA, a indica cu na final di dia a entrega tur mucha un medaya di participacion y e docentenan a ricibi nan certificado di 2 dia di curso na comienso di e proyecto.
IBiSA semper ta cla pa traha cu tur federacion y sigur cu AVB cu a acerca nan p’e proyecto di CONCACAF “Next Play”. Si e proyecto sigui nan ta dispuesto pa yuda, pasobra por a mira con contento e muchanan tabata, con contento e docentenan tabata. Aunke tabatin un tiki solo, asina mes a demostra cu e proyecto aki tin potencial.
E federacion di futbol lo continua cu e tipo di proyectonan aki, pasobra esakinan ta significa hopi pa tur esnan cu ta envolvi den tipo di programanan asina. Entre otro por a mira e alegria cu a reina entre e muchanan y competencia entre e scolnan. Pero na final por a mira tur e muchanan hunto cu a ricibi nan medaya y tambe por a mira e docentenan y e instructornan cu a ricibi nan certificado. Pues tur hende a bay cas contento. Nos tabata satisfecho cu e proyecto.
Na momento di a ricibi luz berde pa organisa e proyecto aki na Aruba, naturalmente mester a encamina un proceso pa haci esaki possible. Asina aki tambe a acerca Minister di deporte y Minister di Enseñansa pa nan cooperacion y asina cu a duna nan e splicacion di e proyecto di biaha nan a bay di acuerdo y a duna aprobacion pa por a acerca e scolnan y acerca IBiSA. Cada un a aporta di nan parti.
“Locual si mi tin cu bisa ta, cu tipo di proyectonan asina cu nos tin cu continua cu nan,” segun ing. Richard Dijkhoff. Bo por mira e entusiasmo, interes y alegria cu tawata reina durante henter e progrma. “Nos sa cu ainda tin un lista di scolnan cu kier participa y e intencion ta pa luna di Februari-Maart organisa e programa aki un biaha mas. E procedura a bay hopi smooth”. Naturalmente ora ta trata di deporte y muchanan, ing. Richard Dijkhoff ta kere cu tur hende ta dispuesto pa coopera y duna nan aporte na esaki.
