Federacion Arubano di Futbol (AVB) a tene un tayer p’e clubnan di division honor riba e cambionan cu ta aplicando. AVB ta den un proceso y ta conta cu sosten di Gregory Engelbrecht, Sport Manager Consulting, pa promove mas profesionalismo, mihor organisacion den e famia di futbol di Aruba. E idea aki a cuminsa 2 aña pasa, pero ful e proceso di haya aprobacion cu structura di FIFA, a tarda un poco.
A cuminsa cu e di 2 parti di esaki y den e dianan aki Gregory Engelbrecht a delibera cu stakeholders di AVB. El a cuminsa sinta prome cu Directiva di AVB, cu e staff di AVB y despues cu clubnan di Division Honor. Tambe e lo reuni cu Division 1 y otronan p’asina tur hende y grupo di AVB por ta riba e mesun liña di structura.
A forma un kader pa tur tin e mesun comprendimento y e obhetivo ta pa tur grupo compronde nan rol y e contexto di structura di AVB. Esey lo yuda e eficiencia di comunicacion, pero tambe e tipo enfoke cu nan tin pa loke ta nan rol si ta di miembro di bestuur.
Tur esaki ta loke ta spera di nan, kico nan tin cu aporta, segun Gregory Engelbrecht. Si ta un club esey t’e contexto cu ta spera di bo, pa nan por haci nan trabou y sigui enfoca riba loke nan mester p’e organisacion ta mas eficiente y cuminsa traha na un forma mas profesional.
Tambe e ta yudando cu e funcionnan den AVB pa por atrae personanan califica p’e trabou, pasobra aworaki falta.
E feedback cu Gregory Engelbrecht a ricibi den e prome parti di presentacion tabata bon, hopi pregunta a bin dilanti. Por a mira cu hopi cos tabata prikel, un tiki mas operacional y mester saca nan un tiki mas afo y haci esaki mas strategico. Esaki ta pa nan ta un tiki mas riba nivel cu AVB ta pensa prome cu bay e siguiente stap di operacional.
Na final di dia lo traha un raport kico tur t’e cosnan mas importante cu e clubnan ta haya. Esaki ta e prome stap. E idea ta pa yuda e clubnan desaroya y yega mas leu, pasobra tur kier t’e mihor, funciona mihor y tin facilidadnan pa ofrece hungadornan.
Hopi club tin hende nobo, pero tin pensamento anticua y tin cierto manera di traha. Tin manera pa cambi’e y AVB sa di dje, pero e ta un proceso cu ta bay poco-poco.
Discusion ta hopi importante, comparacion di ideanan, mustra otro kico ta haci y ora ta haya e pensamento cu si esey por mi tambe por.
Na final e opcion ta keda n’e clubnan mes, FIFA ta pone par di rekisito y ta pone bo pensa riba e direccionnan. AVB mester cumpli cun’e y e clubnan mester cumpli pa keda fit den e direccion ey. Tin cierto regla cu AVB tambe mester sigui. Na final e responsabilidad di e direccion cu AVB ta bay ta parti di e responsabilidad di e clubnan.
