Arubaanse Voetbal Bond (AVB) a ricibi un protesta for di SV Britannia dia 21 di Mei ultimo, nan a protesta contra e wega di dia 18 di Mei 2018 contra di SV Estrella pa un hungado “ilegal”. E wega ey Britannia a perde 2-0 contra Estrella. Despues di a verifica e protesta entrega, AVB a dicidi di no duna SV Britannia rason.
SV Britannia a apela e decision di AVB y a dirigi un carta na Comision di Apelacion (Beroepscommissie). SV Britannia a duna nan puntonan pakico ta apela e decision di AVB cu pa nan no ta esun corecto. E Comision di Apelacion a revisa cada punto y cada informacion ricibi di e tema aki. E comision a tende tanto e representantenan di SV Britannia y SV Estrella y a haya e declaracionnan di AVB.
Esaki a pone cu e Comision di Apelacion a tuma e decision di ratifica e decision di AVB tuma dia 21 di Mei 2018, unda a duna Jean Pierre van der Linden e carnet pa hunga cu SV Estrella. Esaki ta pone cu SV Britannia a perde su protesta.
Cu e decision aki awor, AVB lo mester ahusta e agenda di weganan pendiente, pa por hunga e wega pendiente ainda cu no a hunga diabierna ultimo.
Arubaanse Voetbal Bond (AVB) ta gradici e comision di apelacion pa toch a logra tuma un decision den un periodo relativamente corto y ta yama nan danki pa e pasenshi y cu awor por continua cu e play off.
